Þrasið mitt:

stuttar örfréttir

2007-06-08T15:42:00.000Z

1. er flutt

2. flyt aftur eftir 2 1/2 mánuð

3. er að fara í sumarfrí eftir næstu viku

4. á eins árs útskriftarafmæli í næstu viku

5. er að verða gömul

6. er búin að gleyma hvernig á að hössla

7. lærði það hvort eða er aldrei

8. er snillingur í að velja mér "menn" án framtíðar

9. er félagslegt viðrini

10. á leið í mastersnám í haust

blessó

fokkks

2007-01-04T00:14:00.000Z

Bið ástkæra og trygga lesendur mínar innilegrar afsökunnar á bloggleysi síðustu mánuða um leið og ég óska ykkur öllum gæfuríks árs og friðar á nýju ári, eða eins og einu sinni var sagt skál!

Nýjar hvatvísilegar hugsanir og samsæri verða uppfærð hér um leið og þær frissast út úr hugarfylgsnum mínum.....

Er heimurinn raunverulegur eða er raunveruleikinn heimur? kannski er hann bara fullur af timbruðum músum á flugi með upplitað jólasskraut og rauða nefið hans Rúdolfs á 50% afslætti eftir jólasláturtíðina.

vitleysa....

2006-10-01T19:19:00.000Z

Bið lesendur mína afsökunar á bloggleysinu og hef svosem enga tæmandi afsökun fyrir því nema hugsanlega frásagnarþurrð og fyrirtíðaspennu. Það teljast mögulega gildar afsakanir þó deila megi um hversu réttmætar þær séu.

Úr einkalífinu er fátt krassandi frásagna; hef hvorki skipt um kynhneigð né fengið mér hjásvæfu en hvorutveggja hefur verið ámálgað við mig í orði síðan ég bloggaði síðast. Ég tók þetta að sjálfsögðu til mín og hef ígrundað vel þessar athugasemdir en tel mig að svo stöddu ekki þurfa að gera neitt frekar grein fyrir þeim. Hinsvegar viðurkenni ég að hafa þó nokkuð oft tvíkynhneigðar skoðanir sem ég hef áður reifað á þessari síðu. Engu að síður þakka ég umhyggjusemi fyrir mínum meinta “samlífisskorti” og segi einfaldlega mænd your own bisnesss...

Haustið hefur alltaf verið fyrir mér ákveðinn endurskoðunartími- þá fer maður yfir stöðuna, metur einhverja kosti og gerir einhver plön um framhaldið. Síðustu misseri hefur það að nokkru leiti verið samofið náminu mínu og þá verið skilmerkilega uppsett hvenær næsta próf, ritgerð eða verkefnaskil væru framundan. Núna þetta haustið hefur það ekki tekist og þrátt fyrir að ætla mér að leggja stund á þrjá áfanga hef ég ekki getað komist í gírinn ennþá. Er semsagt alveg óheyrilega kærulaus og hrokafull hvað varðar námsþáttinn.

Vinnan mín er sem aldrei fyrr full af forvitnilegum uppákomum og ýmsum mannlegum snertiflötum sem gaman væri að tíunda í skrifuðu máli. Hinsvegar er það ekki gerlegt.
Til þess að draga saman líðan mína þessa dagana verða því nokkur stikkorð að nægja...
Mér líður eins og :
• Flæktu jólaskrauti
• Hvítvínsflösku án hvítvíns
• Klístruðum ís á jakkafötum
• Dagblaðinu frá því í gær
• Óhollu nammi...

í guðs friði, Sigga

eitt og tvennt

2006-08-30T23:24:00.000Z

1) Uppskera í gömlu kartöflugörðunum í Þykkvabæ er með besta móti þetta árið, handhafar forsetavalds ku dreifa yfir garðana "uppreisn æru" og stór kartöflubóndinn og sjarmatröllið Árni Byko stefnir til Alþingis á ný!

2) Fangavörður í sumarafleysingum er laus úr gæsluvarðhaldi! sat hann einhvern tímann inni eða var hann í vinnunni? Selfosslögreglan segir málið upplýst. Fangavörðurinn fær í laun tvo kíló af hassi.

3) Aumingjans íslendingurinn sem situr í fangelsi í Bra"hass"elínu! en ég vorkenni honum ekki sjett...

4) socialinn er ekki í tísku

5) ...og ég er græn gúrka.

upposí...

2006-08-17T23:18:00.000Z

Fruss, ekki er öll vitleysan eins. Ó sei sei nei, enn koma “trúarleiðtogar” í sjónvarpsviðtöl og vitna í sálfræðinga og sálfræðimeðferðir sem “vinni á samkynhneigð” og snúi fólki frá villu vegar. Mig langar að gubba þegar ég heyri fólk með engar röksemdarfærslur skýla sér og vitna í einhverjar krappý rannsóknir sem aldrei kemur neitt fleira fram um.

Ameríkuhreppur fer á límingunum vegna þess að einhver farþegi í flugi fékk ofsahræðslukast og var auk þess vopnaður handáburði. Útkoman varð sú að orrustuflugvélar voru sendar til fylgdar meintum “terroristum” til næsta lendingarstaðar.
Já eins gott að þessi flugfarþegi var svo upptekinn í ofsahræðslukastinu að hann komst ekki í að bera á sig handáburðinn. Þá hefði flugvélin ábyggilega verið skotin niður með manni og mús. JÁ paranójan hjá Bússa frænda er farin að verða nokkuð áráttu-og þráhyggjukennd...

Akureyri var snúið á hvolf um Versló. Persónulega hef ég aldrei verið neitt sérstaklega mikið um allan þennan Verslunarmannahelgar tremma sem einkennist venjulegast af gróðagræðgi einhverra hagsmunaðila og taumlausri sölu á einhverju drasli sem “þarf að notast þessa helgina”. Auk þess hef ég aldrei skilið þessa hvöt að því að þurfa að smala öllum á einhverja staði til að stefna saman uppskrift af veseni þegar fólk er í misjöfnu ástandi og blanda þessu við fjölskylduskemmtun. Hnuss, en þetta líður eins og allt annað og alla jafna hef ég látið mig hverfa úr bænum þessa umræddu helgi. Það var hinsvegar undantekning á því núna- og lét ég m.a. og féll ég m.a. í hendur markaðshyggjunnar þegar ég lét tilleiðast og fór með strákana mína í tívolí hér í miðbænum.

Eftir helgina fór ég svo í langþráð sumarorlof sem var nú ekki nema eina og hálf vika. En að er hins vegar heilmikið sálrænt að geta sagst hafa verið í sumarfrí. Það var ljúft á alla kanta. Lagði land undir fót með guttana með fullan bíl að viðlegubúnaði og ýmsum búnaði til að bregðast við öllum hugsanlegum uppakomum eða aðsteðjandi vanda!!!

Tjaldútilegan endist nú reyndar bara eina nótt; en við ferðuðumst heilmikið um; keyrðum Þverárfjallið og fórum þar í stutta göngu, komum við á Skagaströnd og í fjöruferð á Blönduósi, gistum svo í tjaldi á Laugarbakka. Þar grillum við silung, spilum fótbolta, drullumöllum, fórum í heitan pott og lásum þjóðsögur. Næsta dag fórum við á Borðeyri og skoðum okkur aðeins um þar, Laxárdalsheiðin var tekin með trompi, komið við í Búðardal. Gaurarnir sváfu í Hvammsfirðinum og mikið var verðrið fallegt og fjöllin tilkomumikil þegar við fórum svo inn Álftafjörðinn og á honum sigldu náttúrulega fullt af álftum. Síðan gistum við í Stykkishólmi hjá frændfólki. Þar komust þeir bræður í feitt því þar var til allskonar “stórt strákadót” sbr. fjárstýrðir bensínbílar og allskonar smádót og bílar. Eftir að hafa tekið út staðinn keyrðum við Vatnaleið og Mýrarnar í algeru slagveðri í Borgarnes. Sem betur fer sofnuðu þeir og vöknuðu ekki fyrr en við vorum komin upp úr Hvalfjarðargöngunum.

Jæja svo eyddum við þremur dögum í RVK. Fórum úr að borða með Strúnunni okkar og hittum líka litlu syss, vorum hjá góðum vinum og fórum í heimsóknir, Húsdýragarðinn, Laugardagslaugina, Kringluna, Ævintýralandið, IKEA.....já semsagt vorum við töluvert á ferðinni í RVK, eyddi líka heldur miklum peningum en það stóð yfir “nauðsynleg endurnýjun á mörgum hlutum”!

Komumst samt ekki í Gleðigönguna (Gay Præd), ég hefði nú mögulega týnd öðrum hvorum guttanum svo ég lagði ekki í það að þessu sinni.

Nú lá leiðin austur fyrir fjallið og fyrir neðan Hveragerði á beinum vegarkafla lentum við í leiðina atviki. Þetta var nú eiginlega í alla staði mjög undarlegt; ég er að keyra í bílaröð og auk þess var töluverð bílaröð sem kom úr gagnstæðri átt. Kemur ekki bíll allt í einu ótæpilega inn á minn vegarhelming ; speglarnir splassast saman og krass. Minn spegill fer af og lakkið á bílstjóra hurðinni er nokkuð krafsað. Bíllinn á eftir mér fékk minn spegil á húddið á sér og sölluð brotin úr speglinum dreifðust þar yfir og upp á toppinn. Ó boy það var ekki fögur sjón. Svo kom gaurinn sem keyrði á mig (hann bara sveigði inn á minn vegarhelming!) og þá var spegilinn hjá honum af og rúðan brotin. Löggan á Selfossi kom svo eftir nokkurn tíma og allir voru látnir blása og sonna – en allavega viðgerðin á mínum bíl og bílnum fyrir aftan er tryggingarmál. Það liggur fyrir að gaurinn olli þessu....

Ömurlegt að lenda í svona, þetta hefði að sjálfsögðu geta farið mjög illa og guð hvað ég hrósa happi fyrir mig og börnin mín svona eftir á – skítt með fjandans spegilinn og lakkið.

Gistum eina nótt á Selfossi í góðu yfirlæti og brunuðum svo heim daginn eftir. Mikið var ég lúin eftir þessa keyrslu og alveg rosalega fegin að vera kominn heim í litla heiminn minn hér á Akureyri....

Svo er rútínan svona smá saman að komast í sínar skorður....

Bæjó spæjó í bilið....

...nýjasta nýtt

2006-08-02T00:03:00.000Z

Var búin að gera skelfilega djúpa og tilþrifamikla færslu sem ekki seifaðist- skrambans; svo hér kemur stutt útgáfa! Dagarnir frussast áfram og kósýheitin eru algerlega yfirnáttúruleg þegar forsvaranleg birtuskilyrði skapast fyrir kertaljós og rökkvaða birtu á kvöldin. Ekki skemmir fallegt sólarlag fyrir og líflegur félagskapur. Er búin að upplifa ófáar gæðastundirnar síðustu vikurnar. Ég hef hlúkast að Súlutindum, sýnt fádæma tilþrif í stafgöngu, matarboð, kaffihúsaferðir, ærlegt spjall fram eftir nóttu, spilamennska svo fátt eitt sé nefnt. Best við þetta allt saman er náttúrulega að eiga góða vini. Lífið væri ósköp fátæklegt án góðra vina. Nú styttist í að ormarnir komi aftur heim og mikið verður nú ljúft að knúsast með þeim, vakna upp við það að einhver sparkar óvart í mann á nóttunni eða vakna að morgni í kuðli á rúmbrýkinni! Eða takast á við síðdegissuð, þriðjudagsþreytu eða fjögurra ára frekju! Já fjarlægin gerir fjöllin blá.

kveðja

2006-07-10T00:44:00.000Z

enn er hjarta mitt tregaþungt; Sigrún mín- óskiljanlegt að líf þitt skuli ekki hafa orðið lengra en þetta, þú átt eitt bjartasta og geislandi bros sem ég hef nokkurn tímann séð.

Kæra vina

Þei, þei og ró
þögn breiðist yfir allt.
Hnigin er sól í sjó
sof þú í blíðri ró.
Við höfum vakað nóg,
værðar þú njóta skalt.
Þei, þei og ró
þögn breiðist yfir allt.

enn uppdeit

2006-07-10T00:43:00.000Z

Sælt veri fólkið, héðan af bæ er harla fátt í fréttum. Ég eyði mínum tíma mest í vinnunni og reyni að hafa eins mikið að gera og mér er framast kostur. Þar sem ég má ekkert segja þaðan þá er það eiginlega borðleggjandi að ég hef fátt að segja. Úr einkalífinu er fátt um fína drætti. Nema það var jú dregin úr mér barnatönn í vikunni! Hafið þið heyrt annað eins og það sem er enn betra – það kemur enginn fullorðinstönn. Ég þarf því mögulega að eyða einhverjum þúsundköllum í fullorðinstönn. Hef sofið mikið um helgina, horft á videó og eitthvað reynt að hreyfa skrokkinn. Á þriðjudag verður væntanlega brunað í sveitina á fjölskyldusamkomu. Náttborið þessa dagana er þakið lesefni um allt milli fátækrar á Íslandi,vímuefnafíknar og dulmála í Íslandssögunni. Afar skemmtilegur kokteill ásamt einni svona ofurkonubók sem heitir Móðir í hjáverkum. Ágætis lesning um súpermömmur út í hinum stóra heimi verðbréfa og vístölu. Annars alveg makalaust merkilegt hvað vísitölur, vertryggingar, lánasúpur og Intrum miðar, ásamt endalausum útreikningum á sjúkradagpeningum og allskonar lífeyri getur fyllt daginn miklum eldmóði. Ég get nú sennilega seint talist einhver töluspekingur en mín fjármál hafa öðlast allt aðrar hæðir eftir að ég byrjaði í vinnunni minni auk þess sem hor í nös og síðdegisfrekja hafa núna annan samhljóm í sálartetrinu á mér....

Yfir og út...

uppdeit

2006-06-26T00:47:00.000Z

Já vindarnir hafa blásið rólega í lífinu hérna í Klettastígnum, þannig að það endurspeglast að einhverju leiti í bloggleysi. Hvað um það, tíminn flýgur samt áfram og allt í einu siglir Júlí mánuður hraðbyri upp Eyjafjörðinn. Það var ánægjulegt að útskrifast sem bakkalár (hafið þið heyrt annað eins!) úr háskólanum- loksins! Ég er skráð í 4. fög í háskólanum næsta vetur; eiginlega er hvert þessara faga kennt í hinni og þessari deildinni þannig að ég telst því vera svona lausaleikskrógi í Félagsvísindum á næstkomandi önn! Því verður að púsla inn í 100% vinnu og barnauppeldi. Þannig að nöldurtuggan tengt streitu, skóla og ofurkonustælum mun að öllum líkindum hefja aftur göngu sína svona c.a. með haustinu. En ég tek mér orð Bubba í munn þessa dagana og söngla “sumarið er tíminn” og reyni að henda reiður á og skipuleggja allt það sem ég “ætla að gera” sem nær í skrifuðum orðafjölda u.þ.b. einu sinni hringinn í kringum landið. Núna um helgina fór ég m.a. í góða menningar og vinaferð til vinkonu minnar austur á héraði. Reyndar kem ég þaðan skaðbrennd og minnandi frekar á sólþurrkaðan tómat heldur en frækinn og forframaðan ferðalang, en mér er alveg sama. Þetta var alveg rosalega andlega nærandi og ánægjuleg ferð í alla staði. Næsta vika verður svo tekin með trompi í móðurhlutverkinu og skemmtilegheitum með gaurunum mínum, því þeir fara svo í burtu í mánuð eftir næstu helgi. Það er einmitt þá sem “to do” listinn þéttist áþreifanlega mikið, því síðust tvö sumur sem þeir hafa farið svona burtu hef ég lagst í eintóma eymd og volæði og ekki nýtt tímann til neins sem uppbyggjandi telst vera. SVO nú á að gera bragarbót á því ! útilegur, vinaheimsóknir, fjallgöngur og fræðalestur hafa því verið settar efst á þessum langa lista, ásamt einhverjum leiðinlegum skildu verkefnum sem ég nenni ekki að tíunda hér. Ég er samt kvíðin í hjartanu, því gaurarnir mínir eru það stór þáttur af mínu lífi og eiginlega LÍF mitt í orðsins fyllstu merkingu, þannig að ég verð að taka þessum skrítna tíma án þeirra af yfirvegaðri meðvitund um að gera sjálfir mér gott!

Jæjaðð mikla á enda runnið...

2006-05-25T15:00:00.000Z

Jæjaað er búið í bili. Ég fékk svei (=nei) frá Háskóla Íslands ásmat tveimur öðrum samnemendum mínum úr BA. náminu. Það komst því enginn af okkur þremur inn í menntaelítuna í Háskóla Íslands þetta árið. Ég ætla ekki að leyna því að vonbrigðin urðu þó nokkuð sterk og almenn geðlæg leyndi sér ekki fyrst á eftir enda er maður búinn að vera í bið, eftir þessu síðan lokaritgerðinni lauk. Líf mitt fór í eitt allsherjaruppnám í u.þ.b. sólarhring eftir að þessar leiðindafréttir bárust hingað norður, þar á meðal kom stóri efasemdarpakkinn um allt sem ég hef gert hingað til og skelfilegir hugarórar um hrakfarir lokaritgerðarinnar minnar! Já maður er eiginlega ekki alveg með öllum mjalla. Núna hefur viðbragðáætlun B tekið við og kem ég því til með að byrja að vinna á föstudaginn og stefni á að taka fleiri fög í Háskólanum næsta vetur. Sjáum svo til hvort ég sæki um aftur næsta vor.

speki vikunnar

2006-05-22T23:41:00.000Z

Jæja, og meira jæææjjja. Gæti alveg þegið að þeim háu herrum í Háskóla Íslands fari að þóknast að senda út dreifibréfið sitt sem annaðhvort segir Já = sem þýðir þá að ég sé að fara í mastersnám í sálfræði þar í haust, eður Nei= ( og þá svei) ég er ekki að fara í HÍ í haust. Einfalt? Það finnst mér. Póstflutningarnir hingað norður eru það sem ekki virðist virka einfalt þessa dagana, allavega er sniglapósturinn lengi á leiðinni og enginn svarar rafpóstinum frá mér, eða símhringingum þrátt fyrir auglýstan viðveru og viðtalstíma. Maður verður því sennilega að fara að venja sig af því að “droppa við” og banka upp á eins og maður gerir hérna fyrir norðan ef mann vantar einhver svör. Ég er að verða nett svartsýn á þetta mastersnámsdæmi þessa stundina.
Sumarið er því óskrifað blað, enda lítið sumarlegt úti núna. Ég vorkenni öllum litlu lömbunum í sveitinni og vildi að ég hefði yfir nægum yl og orku að ráða til að binda enda á þetta ísaldarskeið hið síðara hér á norðurlandinu fagra. Annars hef ég eiginlega allan heimsins tíma í þessari miklu bið eftir örlagadóminum, honum hef ég eytt markvisst í verkefni sem hafa legið lengi á hakanum eins og heimilisverk og frágang á allskonar greinum og drasli sem ég hef verið að lesa og blaða í gegnum í vetur. Vá ef ég hefði þetta allt saman tiltækt í minniskubbnum þarna uppi! úff. Ég er að sannfærast endanlega um það að B.A. ritgerðin mín hafi verið illa ígrundað krapp, svo ég mig langar lítið að eyða orðum í það en samt þetta situr ofan á hjartanu á mér þangað til ég fæ einkunn fyrir- og ef illa fer má eiginlega bóka að þetta fari á sálina á mér! ekki gaman að því. En well sennilega maður er eiginlega bara frekar svartsýnn í þessu fokking leiðinda veðri. Það væri allavega heldur notalegra að vera á leiðinni til Mexíkó eða koma með viðbrunnið vísakort frá London, en ég legg mér orð frú Silfurskottu mér í munn og mæli svo fyrir um að : „minn tími mun koma”!
Ég er að komast að því að ég er sennilega pínulítið pólitískt nörd, ég get gleymt mér yfir spekinni sem vellur frá frambjóðendum í sveitarstjórnarkosningunum þetta árið. Ég er því til og með búinn að komast að því að framboðin riðlast flest ofaná hvoru öðru einhverstaðar á miðjunn; og kjörþokki þeirra misfagur. Þetta eru kannski ekki nýjar fréttir svona rétt fyrir kosningar en ég hef vinstri græna grunaða um að hafa ekki allt hreint í sinni umhverfisullarbrók!
Ég fylli með öðrum orðum þann flokk “sem ekki hefur gert upp hug sinn” og ef væri til grænn sjálfstæðiflokkur með framsóknarrauðu vinstri ívafi myndi ég kjósa hann!
Það er víst ekki í boðið. Mín prinsipp lífsskoðun er að fólk hefur alltaf val, með svolítilli einföldun heitir þetta prinsipp; hver er sinnar gæfu smiður. Ég er samt ekki alveg að kaupa stórar hugmyndir um frelsi, sumir kunna nefnilega ekkert að fara með frelsi og þeirra frelsi getur heft frelsi næsta manns. Hér er ég ekki að tala um að hefta einn né neinn, heldur bara benda á að reglur og takmörk þurfa að vera til að samfélagið fúnkeri fyrir alla, og allir geti átt frelsi og val og allt hvað eina, sem telst til sjálfsagðra lífsgæða nútímans. Það er allt of mikið frelsi og val um allan fjárann í dag (ókey, þetta hljómar kannski eins og ég sé afturhaldsseggur, en svona er minn spilastokkur!). Þessar tvíkynhneigðu skoðanir mínar gera mér því ekki auðveldara fyrir að yfirgefa flokkinn “ sem ekki hefur gert upp hug sinn”.. Mitt valfrelsi á kosningadaginn verður því annaðhvort blátt eða grænt eða jafnvel köflótt. Nema ég fari og kaupi mér búnt af rauðum rósum og gefi hreinlega mitt atkvæði undir rós!

hvað?

2006-05-22T01:05:00.000Z

Já, spurning um að taka þetta til sín!

You Should Get a MD (Doctor of Medicine)

You're both compassionate and brilliant - a rare combination.
You were born to be a doctor.

What Advanced Degree Should You Get?

Að lokum: ég hata skítaverður í maí, common það var nógur tími til að hafa þetta í janúar, febrúar eða jafnvel mars... hnuss...

Daydream beliver

2006-04-27T21:38:00.000Z

All-Around Smart

You are all-around smart. Essentially, that means that you are a good combination of your own knowledge and experience, along with having learned through instruction - and you are equally as good with theoretical things as you are with real-world, applied things. You have a well-rounded brain.

20% applied intelligence
50% learned intelligence

Take this quiz at QuizGalaxy.com

Geri flest annað en læra undir mitt SÍÐASTA próf í HA ever...

Ég hef tekið púlsinn á þjóðmálunum, lesið mér allt til um kaupmáttarskerðingu landsmanna, gengisfall krónunnar, verðbólgu og skuldir heimilanna.
Fylgst með deilu félagsmanna Eflingar í launabaráttu sinni við Stjórn stofnana í heilbrigðisþjónustu eins og um spennusögu væri að ræða.
Lesið dómasafn dagsins í dag hjá Hæstarétti og Héraðsdómi Norðurlands eystra.
Þrætt síður flugfélaganna og ferðaskrifstofanna.
Lesið mér til um dvergvöxt.
Kynnt mér stöðuna í enska boltanum.
Lesið skýrslu nefndar um endurskilgreiningu verksviða innan heilbrigðisþjónustunnar.
Reynt að setja mig inn í breytingartillögu á barnalögum sem lúta að forsjá og ættleiðingum.
Hugað að atvinnumálum
Hugsað um lífið og tilveruna...

...og ekki batnar það!

2006-04-21T22:35:00.000Z

Take this quiz at QuizGalaxy.com

í dag

2006-04-18T23:17:00.000Z

Hef farið góðan blogghring og sé að mikil og almenn tilvistarkreppa ríkir í BA. skrifum samnemenda minna. Ég er engin undantekning á því. Heilsutengd lífsgæði mín eru allavega verulega skert þessa dagana. Langar að koma með miklar og fjálglegar lýsingar á ástandinu á þessu heimili en ætla að sleppa því í bili.

Ég saknaði strákanna minna í dag
Ég keypti bók í dag-
hún kostaði álíka mikið og matarinnkaup í eina viku, ég legg því af í næstu viku eða fæ ristilstíflu því ég þarf að borða bók.
Ég fór í vinnuna í dag
Ég vígbjóst stafgöngustöfunum mínum í dag og spólaði hálfa Akureyri á enda
Ég hugsaði um BA verkefnið mitt í dag
Ég boraði í nefið í dag...

blessó

2006-03-14T21:30:00.000Z

Ég sé mig tilneydda sökum gríðarlegra anna, gengisfellingar og vaxandi verbólgu í fjölskyldugildum og almennum samskiptum knúna til að láta tímabundið af störfum sem síðuhaldari hér á blogginu. Áætlaður starfslokasamningur verður gerður í mánaðarlegri innheimtu hjá LÍN.

Snýst þetta allt um peninga?

2006-02-21T22:44:00.000Z

Það er nú ekki alltaf innihaldsdjúpt sem ég hef tamið mér að skrifa hér á bloggið mitt, enda er mér yfirleitt nokk sama um það, bloggið er frekar mín “listræna útrás” í lífinu.
Hér kemur ein slík:

Í dag var leikinn einn stærsti farsinn í Íslenskri réttarsögu þegar vitnaleiðslum lauk yfir Íslenskum “Jóni” og öðrum Kanadískum með það óheppilega eftirnafn “Motta”. Samkvæmt öllu átti heildar vitnaleiðslunum að ljúka í dag en svo virðist sem þetta leikrit verði leikið öllu lengur. Nú hef ég ekkert vit á lögfræðilegum álitaefnum eða neinu sem yfirleitt snýr að lögfræði en þegar svona krassandi mál eru í samfélagsumræðunni þá hlýtur maður að spyrja sig spurninga sem snúast um mannleg samskipti og almennt siðferði. Málskjölin í Baugsmálinu eru kominn í sér hillu inn í réttarsalnum sem er hátt í tveir metrar á hæð! Hvernig eiga venjulegir samfélagsþegnar að geta botnað í þessari hringavitleysu sem hefur verið snúið upp í “stóra vonda ríkisskrímslið” gegn “Hróa hetti” sem er svo góður við almúgann að gera út gular svínaverslanir um allar trissur ( p.s. ég; almúginn tek ölmusuna sem að mér er rétt og spássera með gulleita innkaupapoka vikulega!)

Sennilega lýsir viðhorf mitt sér í andlegum fordómum eða hreinni vanþekkingu þegar ég get ekki skilið til hvers það þarf allar þessar lagaflækjur? Og hvert var nú upphaflega málið?
Peningar, öfund og græðgi eru að verða eins og samvaxnir þríburar í taumlausu siðleysis sukki sem enginn sér fyrir endann á. Allt er falt fyrir rétta upphæð, allt frá feitum starfslokasamningum til Sinfóníutónleika þar sem borga þarf sérstaklega undir aðalstjörnuna af bankastofnun sem bíður svo “elítunni” að vera með í sóló!
Þrátt fyrir allar þessar dásemdir bryðjum við ritalín sem aldrei fyrr og fréttir um kynferðislega valdbeitingu, hrottafengið ofbeldi og fíkniefnamál eru að verða eins fastir liðir í fréttum eiginlega eins og meirihluti Fréttablaðsins er orðin fasteignaauglýsingar og “aukablöð” um alls kyns drasl.

Alveg eins og peningar geta verið völd í höndum þeirra sem kunna að skylmast með þeim vopnum, getur fjársvelti líka verið valdbeiting. Þessi valdbeiting er ekki ósvipuð sultarólum menntamálastefnunnar á Íslandi yfir þeim þúsundum nema sem fjárfesta með námi sínu í framtíðinni. Í ræðu og riti er orðræðan hástemmd; "rannsóknir, metnaðarfullt, alþjóðlegt og framsækið nám, og gæðastaðlar" eru menntavegsboðskapurinn til háskóla þessa lands. Er þessi boðskapur einhvern tímann samrýmanlegur sultarólum fjárveitingarvaldsins? góð fjáfesting? snýst þetta allt um peninga?....

hjámmss vikunnar

2006-02-06T21:43:00.000Z

Átti snilldarhelgi í borg óttans, við fræðastörf og góðra vina gleðskap. Mátaði mig á háskólasvæðinu og lék túrista í Kringlunni! Fór í kósýheit og hífandi rok og rigningu fyrir austan fjall, merkilegt að í umræðunni um fjórar akreinar yfir Hellisheiði skuli enginn minnast á einhverskonar þokumyllur sem héldu frá þoku og súld og beindu því aftur á haf út eða inn á hálendið! Átti þroskandi og djúpar samræður við skemmtilega og gamla vini og tók hringinn á Kaffibrennslunni, Cirkus og Ölstofunni með ástkærri systur minni til að komst að því að þar eru hlutirnir ekki öðruvísi en venjulega, reykmettað loft og drukkið fólk, sem í sjálfu sér er líka í lagi ef maður sækist virkilega eftir því ásamt fylgisveinum úr timbri daginn eftir. Svona stundir eru nú líka alveg ágætar, ég var í góðum félagsskap svo það er það sem málið snýst um. Timburkallarnir eru nú ekki í fastri vinnu hjá mér svo þeir eru þolanlegir af og til! Annars eru nú engir iðnaðarmenn í vinnu á þessu heimili, nema þá uppgjafar smiður í líki Íþróttaálfsins sem heldur okkur í heljargreipum með mánaðarlöngu orkumaraþoni. Hér eru semsagt mældar fæðutegundir og haldið nákvæmt bókhald með límmiðum, stöðugar æfingar ásamt vatnsþambi og álfastökk um alla íbúð. Þar sem vistarverurnar bjóða nú ekki upp á mikið hreyfirými geta bæði líf og limir verið í stórhættu meðan hæst stendur. Enginn hefur slasað sig hingað til en ein ástæða þess er nú kannski sú að ég hef harðneitað að taka orkustökkið (sem er splitt upp frá gólfi í einu stökki!) en held mig við að foreldrar þurfi að nota orkuslökun þess í stað til að virkja orkuna inn á við. En engu að síður er maður algerlega meðvirkur í þessum og það er bara vel. Boðskapurinn skiptir máli og antisportistinn í mér er á hröðu undanhaldi!!
kv, Sigga stirða

Þrálátar þenkjur!

2006-02-02T00:00:00.000Z

lítil, lúin og lurkum er lamin
hamingjusólin er gengin til viðar
hvernig má hugsunin sú vera hamin
skást er að ýt´enni allri til hliðar

er á leið í borg óttans, tek rispu austur fyrir fjall og kem vonandi heil heim á sunnudag. Blóm og borðar vinsamlegast afþakkaðir en þeir sem vilja hitta á mig í borginni vinsamlega látið mig vita í tíma.

Fullorðið hvað?

2006-01-23T21:25:00.000Z

Sæl öll,
það er langt síðan ég settist niður og skrifaði óformlegt fréttabréf firðinum sem ku kenndur við Eyjar. Fjölskyldan dafnar og þroskast með mestu ágætum. Annar af tveimur karlmönnunum fyllir brátt árin sjö þó mér finnist það harla ósennilegt á stundum, í þokkabót hefur myndast breytt skarð í neðri góm hjá þeim ágæta manni því báðar framtennurnar eru farnar. Árin sjö gefa tilefni til að halda að það sama eigi við um móður hans en eins og við vitum öll eldist hún ekkert eða lætur á sjá (fuss bara), allavega er hún steinhætt að missa tennur svo það getur ekki verið að krakkinn sé að verða sjö ára!

Yngri karlmaðurinn á heimilinu er á fjórða ári og það er nánast ennþá ósennilegra. Mér finnst ég nefnilega stundum ég hafa fengið hann í hendurnar í fyrsta skipti í síðustu viku! Eða nokkurn veginn þangað til að hann reynir að sannfæra mig að það sé allt í lagi að borða nammi þó að það sé ekki nammidagur! , að hann geti ekki klætt sig sjálfur! , fæturnir hans séu svo "þreyttir"og hann geti ekki labbað! , að það sé kakódagur!, að amma eða afi hafi leyft eitthvað sem ég hef bannað! , mitt rúm sé raunverulega hans! eða hann hleypur og stekkur um íbúðina sem illskeytt teiknimyndahetja í sjóræningjabardaga eða geimorrustu sem á engan hátt getur tengst saklausum ungbarnaspékoppum.

Ég sé það best á drengjunum mínum að aldurstölurnar mínar hækka, en hvenær verð ég fullorðin?
í bernskuminningunni er það að vera fullorðin baðað dýrðarljóma. Allt á milli þess að hafa alltaf rétt fyrir sér, ráða háttatímanum sínum, geta keypt sér nammi hvenær sem er, vera alltaf skynsamur, aldrei skömmuð fyrir óþekkt, gera aldrei mistök og eiga ráð við öllu. Því miður uppfylli ég fátt í þessari skilgreiningu; ég hef ekki alltaf rétt fyrir mér, ég er ekki alltaf skynsöm, óþekkt mín er enn til staðar en hefur tekið á sig háþróaðri mynd, ég geri oft mistök og ég veit stundum ekki mitt rjúkandi ráð!! Hinsvegar státa ég af því að ráða mínum háttatíma sjálf og ég get jú keypt mér nammi ef mig lystir svo.

Hvað á ég þá langt í að verða fullorðin? er það eitthvað eftirsóknarvert?
með því að hafa ekki alltaf rétt fyrir mér sé ég önnur sjónarmið, með því að vera ekki alltaf skynsöm fæ ég stundum góð tækifæri til að hlæja eða gráta yfir vitleysunni í sjálfri mér, óþekkt mín viðheldur sjálfstæði mínu, með því að gera mistök veit ég að ég get orðið betri manneskja og ráðleysi mitt ýtir undir þörf mína til að fræðast og leita svara við stærri spurningum. Að loknum degi get ég svo fengið mér nammi áður en ég fer að sofa...
Vonandi er langt í að ég verði fullorðin, því ég veit ekki hvað ég vil, vil ekki það sem ég veit, veit ekki það sem ég skil og skil stundum ekki það sem ég veit...

GREINING: Fullorðinsforðun til lífstíðar án afturhvarfs Z.086

Held samt að fyrirbærið fullorðin/n sem slíkt sé ekki til, heldur einungis fundið upp til að halda barninu í okkur í skefjun því enginn getur heldur sagt hvenær eða hvort við ættum einhvern tímann að hætta að vera börn!

hvað skiptir máli?

2006-01-15T20:52:00.000Z

Fátt til að setja fingurna á þessa dagana. Er að reyna að skipuleggja hernaðaráætlun með samsærisívafi til að ljúka síðustu önn minni í háskóla í bili. Sýnist að hún muni rúma nánast fátt annað en tilbrigði eða í mínu tilfelli viðleitni til akademískrar vinnu. Svo háleitar hugmyndir um ástundun innri hugðarefna eru farin veg allrar veraldar.
Málefni DV hafa tröllriðið samfélaginu og ætla ég að láta óskrifaðar þær línur sem mér duttu í hug um daginn tengdu því málefni eða þá tregðu kirkjunnar þegar kemur að réttindamálum samkynhneigðra. Merkilegt hvað náungakærleikann er hægt að túlka tveimur skjöldum. Annars bara yfir höfuð merkilegt hvað mannlegt eðli er oft óútreiknanlegt og oft á tíðum óskiljanlegt. Við skýlum okkur bak við einhver dyggða gildi sem við túlkum okkur í hag þegar þannig hentar. Þess á milli stundum við “af því bara” og “ eru ekki allir hvort sem er að gera þetta” eða “það finnst öllum það” röksemdafærslur til að réttlæta okkur sjálf!!!
Það má ekki túlka skrif mín sem svartsýnisbölmóð, þvert á móti er mér er þetta bara umhugsunarefni þessa dagana. Við hugsum ekki öll svona eða lifum í litlum svörtum kössum, en stundum er þeir alltof margir sem láta sig ekki málin varða.
Mín lífspeki snýr að því að við skipum öll máli; lítil, stór, feit eða mjó. Okkur er það alveg jafn nauðsynlegt að vita hversu einstök við erum eins og að vita að sá sem stendur við hliðina á þér er einstakur og á sinn rétt alveg eins og maður sjálfur. Þó hann hafi sitt rýrir það ekki þína hagsmuni eða réttindi heldur er um samvinnuverkefni að ræða.

Ofvídasin, Sigga

Gleðilegt ár fólk mitt gott

2006-01-08T00:54:00.000Z

Ætla að henda inn fyrstu færslu ársins, allavega áður en hneyfaður verður þorramatur og slurpað niður með svo tilgerðum mjöð. Hef átt afskaplega letilegan mánuð. Ég nenni nú ekki einu sinni að taka niður jólaskrautið og hef því ákveðið að láta það hanga aðeins lengur og þegar líður á gormánuð mun ég spreyja skrautið gult í tilefni páskanna. Eftir að ég útskrifast flyt ég væntanlega héðan svo ég hef ákveðið að láta bara skrautið fylgja íbúðinni með von um að ég fá tryggingargjald FÉSTA til baka með fullum ávöxtunar kröfum mínum! Ykkur að segja er ég finnst mér áramótaheit klisjukennd og allt þetta kjaftæði um að líta yfir farin veg, fer ekki alltaf fara vel í mann, þannig að nóg er fyrir mig að líta niður á brjóstin á mér þá sé ég að þau hafa sigið svo það hlýtur að hafa liðið enn eitt árið eftir því að dæma! En eins og ég segi og stend við það að fortíðin er saga og framtíðin er gjöf, þannig að gjöf framtíðarinnar væri þá bara brjóstalyfting fyrir bommana mína!!
Já, ég er svona aldeilis jákvæð í byrjun árs sem ég efa ekki að verði alveg fantafínt ár; með nýjum og spennandi tækifærum, meiri dramatík, tilfinningum með dassi af skynsemi í bland við alla vitleysuna sem manni dettur stundum í huga að gera og ef um allt þrýtur þá má reyna starfslokasamning. Þeir ku vera það heitasta í dag og gefa mest í aðra hönd !!!!

Kveðja úr brjóstsýnislandi frá verðandi BA-ista í sálfræði
(nýtt fræðiheiti fyrir þetta og er borið fram baaaasista í sálfræði).

Hverjum ertu líkur?

2005-12-14T12:46:00.000Z

http://www.myheritage.com/FP/Company/face_recognition.php?s=1&lang=EN

Svolítið lýsandi fyrir hvað maður gerir þessa dagana en þetta er snilldarsíða þar sem maður getur séð hvaða frægum einstaklingi maður líkist mest! reyndar hef ég fengið nokkrar útgáfur en sú skársta var af David nokkrum Hasselhoof (djók), kíkið á þetta!

Akademískt viðrini

2005-12-12T11:25:00.000Z

Ég er akademískt viðrini. Ég er ekki búin að vera laus frá skólaklafanum í meira en þrjá daga og ég er alveg ómöguleg. Ég hef ekki fengið eitt auka hjartaslag yfir óloknum skólaverkefnum og er eiginlega að fara að taka auka slag vegna þess. Ég hef ekki farið upp í skóla í þrjá heila daga! Ég hef ekki opnað eina sálfræðibók allan þennan tíma, ekki lesið eina rannsóknargrein eða reytt hár mitt yfir illskiljanlegum heimspekilegum pælingum tengt hugfræði. Ég er eiginlega eins aumkunarverð sem hugsast getur, ég nærist sennilega á því að hafa allt of mikið að gera og vera með spennuþröskuldinn stilltan á sem hæsta tíðni. Ég er meira segja orðin eins og gamla fólkið, vakna alltaf kl 6:30 og get ekki sofið lengur, reyndar svaf ég til 7:30 í morgun þannig að kannski lagst þetta en comm on þetta er ekki gaman. Nú má ég allavega sofa og guð veit hvað ég þarfnast þess en á kvöldin er ég svo yfir mig spennt að ég næ mér ekki niður. Ég held að ég sé búin að rugla allan svefnhringinn minn því ég er varla klár á hvenær er dagur og hvenær nótt enda er hvort eða er alltaf dimmt.
Nú þarf ég greinilega að fara að komast úr bænum, í sveitasæluna, klappa kindunum og henda í þær eins og einni tuggu....

Annars kæra þakkir fyrir snilldar Árshátíð Skyn-og Rökvillufélagsins í Hvítum sokkum..

kjánadagur

2005-12-02T13:04:00.000Z

Líður kjánlega, ekkert að gera nema bíða eftir heimaprófinu en bíddu nú við; jú eitthvað þarf að gera á stórheimilinu, eins og að rýma til svo sjáist í gólfið, týna risaeðlur og pilla pleimódót innan úr ofnunum. Brjóta saman metersháa stafla af þvotti, komast að því hversu mikið hlutfallið er af óhreinu leirtaui á móti hreinu, fara í forðaferð til að fylla á tómann ísskápinn... og beisiklý heimilisstörf!!!!

sálar frétt 6

2005-12-01T09:40:00.000Z

Nokkurrar ritstíflu hefur gætt á stældum og stolnum lýsingum á samnemendum mínum. Ástæðurnar eru margar og vitna ég einungis í síðustu skrif mín hér á bloggin máli mínu til stuðning. Hvað um það, þessa dagana einkennist málefnakrúð mitt af því að...”mín persónulega skoðun er “, svolítið frasakennt og einnig koma fyrir orðin áhugavert, mögulega, hugsanlega, áreiðanleiki og tilfinningagildishlaðið. Ekki spyrja mig af hverju?

Ætla að reyna bæta fyrir böl mitt og henda hérna inn nokkrum illa lyktandi línum og næsta fórnarlamb mitt. Það má nú samt sennilega seint segja að sá einstaklingur sé eitthvað illa lyktandi síður en svo. Hún er alveg einstaklega ilmandi sú góða kona. Frá fyrstu stundu hef ég haldið því fram og trúað statt og stöðugt á það að þessi kona eigi eftir að gera óhefðbundna hluti í lífinu og það að hún sjái lengra en nefi sínu nær. Frá fyrstu stundu hefur hún líka sýnt að hún hefur beinin í nefinu nákvæmlega þar sem þau eiga að vera. Ef ykkur rennir ekki grun í hvern ég er að skrifa um leggið þá augun aftur og hugsið um eitthvað í svörtum fötum! Er nú reyndar sannfærð um að stælisti hljómsveitarinnar í Svörtum fötum hafi stolið hugmyndafræði þessarar ágætu konu. Allavega er nafnið stolið úr outfittinu hennar Valeyjar en hún fær þann vafasama heiður að vera sjötta fórnarlambið hérna, reyndar hefði hún MÖGULEGA átt að vera númer sjö í röðinni því hún hefur eitthvað svona sjöunda skilningarvit þegar kemur að áhugamálum sínum. Þau eru einna helst þau að drekka dæet kók, reykja, viðra hundana sína, knúsa hann Hjalta sinn og ekki síðast en síst að skrifa summary. Reyndar hvíslaði að mér lítill fugl að þegar að komi að því að þau Hjalti gangi í heilagt hjónaband verði eftirnöfnum þeirra breytt í Summary. Hjalti mun hafa samþykkt það í skiptum fyrir að endurheimta konu sína frá námbókum og losna undan því að vera “daddy daycare”. Í vetur hefur Valey af röggsemi stjórnað umræðutímum í öðrum bekk með ekki minna snillingi en henni Jóu en þar munu hafa sameinast í eitt stálið og sleggjan þannig að annar bekkur hefur ekki átt sjö dagana sæla, en svo er líka svolítið erfitt að vera “insane in sane pleises” (Summary et. al,2005). Auk þess mun Valey vera að gefa út metsölubókina "Myrkur í undirheimim Eyjafjarðar" sem er afrakstur þriggja ára rannsóknarvinnu hennar við háskólann. Mun þetta vera fyrsta bók sinnar tegundar og er næsta víst að hún skila sér sterkt inn í jólabókarflóðið. Án efa mun Valey fara hamförum á vettvangi dulsálarfræði en það er hennar sérsvið og lýsir henni einna best með formúlunni D/3 = dularfull,dramatísk og dásamleg.

Í dag fær Valey bakklappið mitt.....

Tilfinningar

2005-11-30T09:22:00.000Z

Í dag ku vera rétt 24 dagar til jóla. Það er gott, mjög gott. Tilfinningaskýin eru lágt á lofti og ekki laust við að tilfinningarnar hlaupi með mann í gönur- út og suður. Við í tilfinningahlaðna hópnum erum búnar að leggja geðveika vinnu í rannsóknarskýrsluna okkar og erum vel ánægðar í dag, enda skýrslan búin. Á eiginlega bara eftir að skila herlegheitunum og hugsanlega einhverjar smávægilegar tilfæringar í orðalagi, annað ekki. Hópavinna hefur kennt mér ýmislegt og er að mörgu leiti gefandi félagsskapur; með öllu því sem fylgir. Hvort sem um er að ræða að fá annað sjónarhorn á hlutina, læra eitthvað nýtt í ritvinnslu, fara alls konar útúrdúra eða hreinlega bara aga sjálfan sig og bera virðingu fyrir öðru fólki. Einna helst kynnist maður þó sjálfum sér best, sem er gott. Líður eiginlega samt mest núna eins og ég hafi fætt barn; það er gríðarlegur léttir en sælan er engan veginn sambærileg. Tek hatt minn ofana fyrir meðþjáningarsystrum mínum í þessari fæðingu.. í dag erum við þreyttar.

Streitu- og félagslyndiskvarði símatsnemans

2005-11-25T23:29:00.000Z

er svo upprifin yfir allskyns prófum og tölfræðiútreikningum þessa dagana að ég setti saman lítið próf sem gaman gæti verið að taka til að sjá raunverulega stöðu sína. Góða skemmtun!

Take my Quiz on QuizYourFriends.com!

kveðja SPSS fan

já hvað er títt...

2005-11-24T23:03:00.000Z

Jæja hvað er títt, tíðin ekki sem verst og stutt í jólafrí. Er samt alveg einstaklega einmann, án vinstri eða hægri helminganna minna sem eru ekki heima í þessum töluðu orðum. Spurning um að fara að fá sér upphitað rafmagnsteppi og tvöfaldan koníak...
Hef nú samt ekki tíma til að sitja í einhverjum heimabökuðum blús því nóg er um að vera í skólanum. Ó sei sei já. Búin að eyða nánast megninu af deginum í gangasöfnun og úrvinnslu í skemmtilegri rannsókn sem ég og tvær aðrar í 78 hópnum erum að gera. Ég og SPSS tölfræðiforritið vinsæla sömdum frið eftir um það bil tveggja tíma baráttu og sammæltumst um að betra væri að fara á kostum en taugum þannig að ég hef setið stíft við skjáinn og dritað inn tölulegum staðreyndum um skráningu orðalista með hlutlausum og tilfinningahlöðunum orðum í hentugleikaúrtaki!!! Böööö
Gaman að því. Mikið hlakka ég til að komast í jólafrí, lesa allar bækurnar sem mig langar til að lesa; ég elska bækur- sem mig langar til að lesa!!!!Já ég er eiginlega pínu bókanörd því ég fer allavega eina til tvær skoðunar og forvitnisferðir í bókóbúðir fyrir jólin og er verulega lennnngii...mér finnst bara alveg einstaklega gaman að handfjatla bækur. Um jólin ætla ég að lesa Psycholgy and pain, Réttarsálfræðinginn – Gísla saga Guðjónssonar, Kalmennskan og jafnréttisuppeldið, líta í bókaröðina Vér Íslands börn og sökkva mér loksins ofan í bók sem ég keypti nýlega en hef ekki enn lesið almennilega en það er saga Simone de Beauvoir. Nauðsynlegt líka að líta í allavega eina Arnaldarbók... það eru samt miklar líkur á að ég sofni hreinlega 9.desember og vakni ekki fyrr en 9.janúar eða seinna...

sálar frétt 5

2005-11-22T13:33:00.000Z

Það er kominn tími á því að henda hérna inn nokkrum illa liðnum orðum um næsta samnemanda minn sem ku verða nr 5 í þessari geysispennandi framhaldsþáttaseríu.

Að öllum öðrum ólöstuðum getur hlutfall talaðra orða miðað við hlutfall skilinna orða á mínútu farið algerlega úr jafnvægi þegar hún opnar munninn. Í hennar fjölskyldur gildir frumskógarlögmálið “hér talar hver fyrir sig” og í viðleitni til að bjarga sér á því heimili hefur verið fundið upp skemmtilegt málkerfi sem er svonefnt “no limit speed language” eða tungumál án hraðahindrana. Ég kynni fram á sviðið burtflytjandi nágranna minn Grétu Garbo Hááá´. Þegar á fyrsta ári markaði hún sérstöðu sýna sem hvít Yearissa á ofursnúningi og hefur haldið því æ síðan. Skemmtilegast er þegar hún tekur sér fyrir hendur hinar ýmsustu kúnstir eins og að endurraða og þrífa hátt og lágt fyrir próf eða flytja. Gréta er ekki við eina fjölina felld þar sem hún hefur mikla hæfileika á sviði flutningsálfræði sem eins og þið vitið ekki er ný tegund sálfræði sem hefur það að leiðarljósi að flytja eins oft og mikið og kostur er húsgögn og önnur viðhengi um lengri eða skemmri vegalengdir. Enda veit Gréta líka lengra en nefi sýnu nær því flutningsálfræði er náskyld heilsusálfræði þar sem eilífir tilburðir með húsgögn og búslóðir gerir fólk massað og fitt. Það er einmitt ein aðal ástæða þess að við Gréta ásamt öðrum skrýtnum gerðum frábæra rannsóknarskýrslu á öðru ári “um þörf meistaraflokks Þórs í knattspyrnu á íþróttasálfræðingi”? Þess bera að geta að styrktaraðilar þeirrar rannsóknar voru meistaraflokkur Þórs í knattspyrnu en Þórsheimilið er og verður hennar annað heimili hversu oft sem henni tekst að flytja á lífsleiðinnni. Og þar sem guttarnir í meistaraflokknum töldu þörf á íþróttasálfræðingi við við tölfræðilega martekt upp á cronbach alpha 0,05 þá hringja þeir bara í Grétu því hana vantar alltaf flutningsmenn!!

Hún Gréta mín fær klapp á bakið í dag og saknaðarkveðjur úr nágrenninu!!

p.s.´...svo allir: slaka, slaka og svo slaka....

eitthvað tröllapróf

2005-11-20T22:24:00.000Z

Stjórnmálaþurs

alltaf er eitthvað sem kemur á óvart, en þetta kemur nú skemmtilega í framhaldi af málgleði minni sl. föstudagskvöld!!!!

Þú ert vanaföst, tilfinningarík félagsvera.
Í margmenni á stjórnmálaþursinn oftar en ekki orðið. Ef einhver hyggst grípa fram í fyrir honum talar hann bara hærra - og það virkar. Hann hefur sterkar skoðanir á flestu, hvort sem um er að ræða fjárlagahalla ríkisins eða það hvort SS eða Goða pylsur eru betri, og gerir hvað hann getur til að þröngva þeim upp á aðra. Stjórnmálaþursinn þarf að passa sig þegar hann er í nærveru þeirra sem eru ósammála honum því blóðþrýstingurinn á það til að rjúka upp.

Stjórnmálaþursinn vantar ekki nýja skó fyrr en það er komið gat á þá gömlu... sem skósmiðurinn segist ekki geta gert við. Stjórnmálaþursinn veit hvar Guðsteinn er með verslun.

Hvaða tröll ert þú?

...lufsa dagsins

2005-11-19T11:40:00.000Z

Drita hér nokkrum línum inn frá Galakvöldinu góða sem ég skemmti mér snilldarvel á í gærkvöldi og nokkuð fram undir morgun. Snilldin er nú ekki alveg eins stórkostleg þessa stundina en ég eyði nú ekki frekara púðri í smáatriðalýsingar á þeim. Átti þó rusulegar samræður um hluti sem ég hef ekki sérfræðiþekkingu á neinn hátt í gærkvöldi : eiginlega allt milli Sjengen samkomulagsins, rökvillna og human rights. Ég er nú enginn sérstakur málaflutningsmaður og sérstaklega ekki þegar ég er upp á mitt besta, mín leynivopn fyrirfinnast frekar í rituðu máli. Það er samt alveg merkilegt hvað ég finn mikla þörf hjá mér þegar síst skildi til þess að rökræða hluti sem ég hef engan persónulega innsýn í hvort sem það er vítamín notkun eða aðstæðubundnar pælingar. Uppá síðkastið hefur þemað hjá mér líka verið stjórnmál og samsæriskenningar á alþjóðlegum grundvelli!!
Þar sem stærstu samsæriskenningarnar hjá mér þessa stundina eiga sér stað hjá timburmönnunum hérna efstu uppí sjónsvæði heilans ætla ég að fara að láta pistli þessum lokið. Þess ber þó hér að geta að í þessum skrifuðu orðum er í pásu frá stífri setu við námsbækurnar og megintilgangur þess að minnast á það er sá að: vekja athygli á því að hafa verið komin á fætur fyrir kl 9 í morgun og byrjuð að læra fyrir kl 10.

nr 4

2005-11-17T22:40:00.000Z

Þar sem athyglissýki mín á sér enginn takmörk sett og athyglisbrestur minn gagnvart náminu þessa stundina er almennur jafnt sem víðtækur sé ég mig tilknúna að drita hér inn nokkrum línum. Annar er þetta orðin þó nokkur pressa hjá mér að standa mig í skrifum hérna blogginu að til vandræða horfir. Þar sem pressan er að verða slatta ógnvekjandi jaðrar þetta við að vera komið út í frestunaráráttu! En það er önnur og lengri saga...

Rakel verður efni næstu sögustundar. Mínum fyrstu kynnum við hana gleymi ég aldrei, því sjaldan eða aldrei hef ég séð nokkurn eiga í jafn örvæntingarfullu kreppustigi við WebCt eins og hana... það var nýnemadagana forðum daga. Hún hefur nú samt lögnu hrakið alla tölvupúka lengst út yfir Atlandshafsála og án þess að hallmæla neinum þá á hún án efa eftir að eiga stóra og stórmerkilega vísindaframtíða þó hún verði nú sjálfsagt á öðru götuhorni en á gatnamótum Húsavíkur og Kópaskers. Auk þess að vera með eindæmum samviskusöm, klár og smart á alla kanta kann hún líka ýmislegt sem er minna smart. Hún getur notað stærri lýsingarorð en aldurshnigin togarasjómaður og kallar nú ekki allt ömmu sína. Við hliðina á Rakel kemst ekkert múður og persónulega vildi ég ekki vilja lenda alvarlega upp á kant við konuna því hún kann að svara fyrir sig svo um munar. Svo má íþróttaálfurinn alvarlega fara að vara sig því hann er nú ekki eilífur og án efa myndi Rakel fylla skarð hans með miklum sóma og prýði og mun flottari brjóstum en álfurinn sjálfur getur státað af!
Hvort sem um er að ræða úrsprungna sjálfstyrkingarskilmála eða yrta reglustjórnun þá er Rakel best í því; hún virðist hreinlega lifa og nærast á því sem hefur í för með sér hegðun með skiptitöf; þ.a.e.s. hún þarf ekki að komst strax í snertingu við afleiðingarnar heldur vinnur hún af festu og öryggi að settu marki. Ég sakna hennar úr nágrenninu og hún fær bakklór dagsins frá mér....

sálar frétt 3

2005-11-15T21:55:00.000Z

Þriðji einstaklingurinn sem ég helga pláss hérna á blogginu mínu er Dísa sem með meiru er eldhúsútsýni mitt á löngum kvöldum þegar setið við tölvuna og blaðað í bókum. Býð þess enn að tekin verði limbískur kombódans með tilþrifamikilli sveiflu þarna hinu megin. Þessi unga snót hefur að mestu leiti að mér skilst alið óttann í borg óttans; Reykjarvík. Önnur praktísk atriði sem ég veit um hana Dísu mína eru þau að þegar hún fæddist leið yfir ljósmóðurina því aldrei fyrr hafðu hún augum litið svo fagurt og frítt meybarn með ölfant í vinstri hendi og naflastrenginn vafinn utan um Handbók djammarans, það fyrsta sem þetta undurfagra meybarn gerði var að ropa og syngja hástöfun: ....”de var brendavæne i flasken da jeg kom”.....Handók djammarans hefur reynst gott vegarnesti á lífsins leið Dísunnar því eins og Geirmundur sveiflukóngur Skagafjarðar komst að á svipuðum tíma og Dísa leit dagsins ljós var að ...nú er ég léttur, orðinn nokkuð nettur, er í ofsastuði og elska alla menn... hann Geirmundur þyrfti nú að hafa djammstílista eins og hana Dísu okkar. Bókin góða er litla biblía Dísunnar sem hún hefur æ síðan gert að leiðsögn í sínu lífi. Enda megum við sem þekkjum Dísu vera þakklát því að stelpan er náttúrulega bara snillingur í orði sem upp á borði eða hverjum myndi detta í huga að vinna sprellmótið á síðust metrunum með kvenlegu innsæi sínu; engum nema Dísu tekst allavega svoleiðis!!
Enda daman eðaldama sem án efa á eftir að standa sig vel á sínu sérsviði sálfræðinnar sem hefur reyndar lítið verið kynnt hingað til enda eru hliðaráhrif djamms betur þekkt sem vandamálahegðun en ekki listgrein. En Dísu tekst allt og hún fær því klapp dagsins frá mér í dag.....

sálar fréttir nr 2

2005-11-13T18:31:00.000Z

Annar í röðinni hér fær að vera annar af tveimur karlkyns samnemendum mínum í sálfræði. Af öllum öðrum tók ég þennan mann fyrst tali þessa fyrstu vísindadaga mína í Háskólanum. Þessi ágæti maður ku hafa fengið nafnið Tryggvi snemma á sinni æfi og haldið því óslitið síðan. Þó svo ég þekki ekki innstu skúmaskot Tryggva nema af mínu sérstæða innsæi í persónuleika fólks þá get ég sagt ykkur að honum finnst gott að sofa og helst þegar geislar sólarinnar þröngva sér inn um gluggatjöldin eða snúa sér yfir á hina hliðina og kúra lengur hjá henni Sólveigu sinni. Það er orsakasamband þar á milli og þess að hann Tryggvi spilar playstation leiki lengi nætur. Hins vegar gefur það okkur hinum ekki góða sögu sem mætum meira en hann í skólann að alltaf er hann að brillera í öllum fögum og það þrátt fyrir að hann segi að sinni alkunnu hógværð og líbóisma “ég var ekkert búinn að lesa neitt mikið” eða “róleg” ef einhver óþarfa æsingur að hans mati er í gangi í röðum meirihluta kvenkyns samnemenda hans. Tryggvi hefur boðið mér að horfa á fótboltaleik með sér einhvern tímann í framtíðinni og vona ég að hann standi við orð sín en hann ku vera mikill keppnis og áhanganda sinni. Til að gera langa sögu stutta þá vil ég minna á að keppnismaðurinn Tryggvi hreppti klínsku sáfræðingaverðlaunin fyrr á þessu ári en þeim verlaunum fylgja miklir möguleikar og heillaóskir til framtíðar. Tryggvi leitar aldrei langt yfir skammt og því kaus hann sér kvonfang innan sálfræðinnar og getum við ímyndað okkur hvernig heimilislífið gengur fyrir sig þar: vakna eða ekki vakna, gefa rottunni í Skinnerbúrinu að borða, sofa eða ekki sofa, STRYKJA sambandið, framkalla hegðunina að fara á fætur, styrkja hegðunina að fara í skólann, beita hugrænni atferlismeðferð á makann, láta Skinnerdúfuna ýta á takka, nota umbun í uppþvottinum.....

Æ jæja, svona er þeir aumkunarverðir sem skrifa um líf annarra, Tryggvi ef ég hefði verið alvöru karlmaður hefði ég vilja vera 1/3 eins og þú...
Í dag færð þú klapp á bakið frá mér.......

sálar fréttir

2005-11-12T22:58:00.000Z

Síðust vikurnar í skólanum þessa önnina ætla ég að reyna að birta stutta pistla um samnemendur mína í Háskólanum. Ég hef einsett mér að setja saman nokkrar línur um hvern og einn þeirra yndislegu einstaklinga sem ég hef gegnið samhliða í súru og sætu síðustu misseri. Pistlarnir eru einungis settir saman til gamans og eiga ekki að vera til þess fallnir að særa neinn. Ef einhver ykkar skildi hafa mikið á móti pistla skrifum um sig frá mínum bæjardyrum, vinsamlegast látið mig vita !!!! takk Sigga

Í upphafi var orðið.....
Á sólríkum haustdegi á því ágæta ári 2003 hófu nokkrir saklausir og syndlausir einstaklingar akademískan vísindaferil sinn, í dag eru þeir ekki saklausir og syndirnar sjást langt út á Eyjafjörð. Heldur hefur fækkað í hópnum en saklausu syndaselirnir koma til með að gæða lífið litum framtíðarinnar því þau fylla flokk einvala liðs verðandi sálfræðinga, ég leyfi mér að kynna hér verðandi sálfræðinga framtíðarinnar og ágæta samnemendur mína. Með það að leiðarljósi að gera lesendum þessarar síðu kleyft að velja sér sálfræðiaðstoð við hæfi!!!

Fyrsta ber að nefna Jóu, sem hefur fengið heiðursdoktorsnafnbótina “the big mama” félagvísindadeildarinnar. Meðfram námi sínu stundar hún grimmt að afla sér sambanda á öllum vígstöðvum og er m.a. annars í tengslum við fólk í öðrum víddum. Auk þess að eiga mikil tengsl við alla sem ganga um matsal Háskólans á Sólborg. Í frístundum sínum fer hún út að reykja, en passar þó ávallt upp á að fara ekki útfyrir 300 metra radísu matstofu Háskólans. Hennar helstu kennismiðir eru róttækir atferlismeðferðarsinnar að nafni Ellis og Beck. Og má þess geta hér að sala á bjór í nafni Jóu verður senn hafinn, munu það vera styrktaraðilar hennar úr öðrum bekk í sálfræði sem standa fyrir þeirri markaðssetningu í von um að hún sýni þeim frekari linkind í umræðutímum í almennri sálfræði. Sérsvið Jóu eru á sviði drastískrar sálfræði sem hún kemur án efa til með að þróa enn frekar í náinni framtíð með framúrstefnulegum hugmyndum sínum um að “fólk sé bara einfaldlega fífl”. Jóa sést samt sjaldan örðuvísi en brosandi og ef hún er ekki brosandi þá er hún hlæjandi...

Með þessum orðum gef ég Jóu minni vænt klapp á bakið............

væl

2005-11-03T09:05:00.000Z

Hej,
Veit ekki alveg hversu gáfulegt er að blogga þessa stundina þar sem vindar neikvæðni og sjálfspirrings eru ríkjandi hérna í mínu nánasta umhverfi. Sennilegast er orsakasamband milli þess og streittra aðstæðna í skólanum. Fólk er farið að verða þreytt enda liðið vel inn í önnina og samt er brjálæðisleg vinna eftir. Fyrir sjálfa mig gerir nöldur lítið nema kannski létta á þanþoli lundarinnar. Í staðinn fyrir að nöldra í pistli dagsins út í eitt, ætla ég að skrifa nokkrar fullyrðingar um hvað ég MYNDI vilja vera að gera þessa stundina annað en hamast í að lesa endalausa hauga af rannsóknum, gera löng og stutt verkefni, lesa fyrir próf, lesa fyrir næsta próf, gera tvær stórar ritgerðir, halda fyrirlestur..........
1) Leika mér og fíflast með strákunum mínum
2) leika mér úti í snjónum
3) fara í Jólahúsið
4) mála piparkökur
5) fara í sund
6) fara á skíði
7) velja sjálf hvað ég les !!!!!
8) sofa

Góðar stundir

kornið sem fyllir mælirinn....

2005-10-29T19:32:00.000Z

Fékk þetta sent í tölvupósti um téð NÁMSKEIÐ FYRIR KARLA!!
læt ykkur um álit á þessu

Hvert námskeið tekur tvo daga og efnið er eftirfarandi:
HVERNIG Á AÐ FYLLA ÍSMOLAMÓT ?
Skref fyrir skref með glærusýningu.
KLÓSETTRÚLLUR: VAXA ÞÆR Á KLÓSETTRÚLLUHALDARANUM? Hringborðsumræður.
MUNURINN Á RUSLAFÖTUM OG GÓLFI-Æfingar með körfuefni (teikningar og módel).
DISKAR OG HNÍFAPÖR: FER ÞETTA SJÁLFKRAFA Í VASKINN EÐA UPPÞVOTTAVÉLINA?Pallborðsumræður; nokkrir sérfræðingar.
LÆRA AÐ FINNA HLUTI-Byrja að leita á réttum stöðum í stað þess að snúa húsinu við gargandi -Opin umræða.
TÓMAR MJÓLKURFERNUR; EIGA ÞÆR AÐ VERA Í ÍSSKÁPNUM EÐA Í RUSLINU?
HEILSUVAKT; ÞAÐ ER EKKI HÆTTULEGT HEILSUNNI AÐ GEFA HENNI BLÓM-PowerPoint kynning.
SANNIR KARLMENN SPYRJA TIL VEGAR ÞEGAR ÞEIR VILLAST-Sönn saga frá manninum sem spurði til vegar.
ER ERFÐAFRÆÐILEGA ÓMÖGULEGT AÐ SITJA ÞEGJANDI MEÐAN HÚN LEGGUR BÍL?Ökuhermir.
AÐ BÚA MEÐ FULLORÐNUM; GRUNDVALLARMUNUR Á ÞVÍ AÐ BÚA MEÐ MÖMMU ÞINNI OG MAKA-Fyrirlestur og hlutverkaleikir.
HVERNIG Á AÐ FARA MEÐ EIGINKONUNNI Í BÚÐIR-Slökunaræfingar, hugleiðsla og öndunartækni.
AÐ MUNA MIKILVÆGAR DAGSETNINGAR OG AÐ HRINGJA ÞEGAR ÞÉR SEINKAR-Komdu með dagatalið þitt í tímann.
AÐ LÆRA AÐ LIFA MEÐ ÞVÍ AÐ HAFA ALLTAF RANGT FYRIR SÉR- Einstaklingsráðgjöf og samtöl

Já það er nú allt til á þessum síðustu og verstu tímum, ætla ekkert að fjölyrða um það meir...

Boðskapur dagsins

2005-10-27T08:08:00.000Z

Er búin að vera á væmnari kantinum síðustu daga svo þessi mynd segir sig algerlega sjálf!

Góðar stundir

...dagurinn í dag!!

2005-10-26T10:59:00.000Z

Ég er með hnút í maganum í dag. Hélt að það væri stresshnútur fyrir prófið á morgun eða eftir afmæliskökuát gærdagsins sem svona ykkur að segja tókst allt saman prýðisvel og synirnir voru mjög þreyttir í gærkvöldi!!!
Hnúturinn er eiginlega bara eins og stór köggull, svona harður sem framkallar sting í hjartanu. Í dag eru liðin 10 ár frá snjóflóðinu á Flateyri og umfjöllun um það í fjölmiðlum. Ég missti sjálf nákomin ættingja í snjóflóði fyrir tæpur tveimur árum og þessi dagur er mér áminning um þá erfiðu reynslu. Ég get sett mig að einhverju leiti í spor þeirra sem á þessum degi horfa með sorg og eftirsjá til ættingja og vina sinna. En í dag ætla ég að minnast frænda míns sem fórst fyrir tæpum tveimur árum með þakklæti í hjartanu. Hann frændi minn tók einn dag í einu og hugtakið stress eða fyrirferð var ekki til á lífslistanum hans. Í dag er ég þakklát fyrir að hafa gengið samferða honum um tíma í lífi mínu, þakklát fyrir að eiga minningarnar um hann og þakklát fyrir að staldra við, hugsa til baka og taka einn dag í einu...............

Í dag.

Dagurinn í dag er dagurinn þinn.
Þú getur gert við hann
hvað sem þú vilt
Gærdaginn áttir þú.

Honum getur þú ekki breytt.
Um morgundaginn veist þú ekki neitt
En daginn í dag átt þú.
Gefðu honum allt sem þú megnar
Svo einhver finni í kvöld að það er gott að þú ert til

A rosenbladt.

...vellíðan dagsins

2005-10-25T10:46:00.000Z

Mér líður alveg afskaplega vel í dag. Eiginlega svo vel að ég sé mér ekki annað fært en að gera það að upphafsorðum mínum í bloggpistli dagsins. Dagurinn í dag og góður fyrir margar skakir. Það er fallegt veður úti, styttist í jólafríið, þriðjudagar eru yfirleitt betri en mánudagar, og síðast en ekki síst er afmælisdagur annars af tveimur afkvæma minna. Já hann er þriggja ára í dag þessi elska. Í tilefni þess ætla ég að helga honum nokkrar línur hér í tilefni dagsins. Fyrir nákvæmlega þremur árum fæddist hann blessaður, eldsnemma um morgun og það var eins og ég hefði alltaf átt hann. Hann fæddist á fjórum tímum og ég var kominn með hann heim um kaffileytið sama dag. Síðan hefur strengurinn milli okkar þést í gegnum súrt og sætt og í dag er hann orðinn eins “sjálfstæður” og aldur hann leyfir, hann nærist á fíflagangi og bröndurum. Íþróttaálfurinn og Bósi ljósár eru miklar hetjur í hans augum og hann tekur fyrir ýmsa furðulega frasa og notar þá í tíma og ótíma. Núna er það “kúlevjúúu” og hann þykist fljúga um íbúðina, svo er hann alltaf að leika sér með ímyndaðan fugl sem í rauninni er orðinn að fuglafjölskyldu. Fuglarnir geta meira að segja keyrt traktor. Með prakkaralegu brosi og vænu knúsi getur drengurinn brætt mömmu sína og stundum hringsnúið henni all mikið í kringum sig. Um daginn átti hann að klæða sig í skóna sína og settist óþolinmóður á gólfið og sagði “mamma, e get ekkki” , “jú, jú víst geturðu” sagði mamman. Þögn. “mamma e ekkka tig, egg ætta kúsa tig fast” kemur og knúsar mömmuna og heldur á skónum og réttir mömmunni, þau knúsast og mamman klæðir drenginn þegjandi og hljóðalaust í skólana, í sæluvímu yfir að eiga svona elskulegt barna sem tjái sig svona hispurslaust um ást sína á mömmu sinni!Já svo mörg voru þau orð. Þessi mamma er ótrúlega heppin að eiga svona yndislegt barn, og ekki eitt heldur tvö svona einstök þó ólík séu. Í dag líður mér afskaplega vel, því ég er lánsöm mamma.....

...drama dagsins

2005-10-20T22:38:00.000Z

Það er skammt stórra högganna á milli þessa dagana. Mikið að gera í skólanum og þriggja ára afmæli með öllu tilheyrandi í undirbúningi. Vá hvað tíminn er fljótur að líða og vá hvað það gerist mikið á þremur árum. Án þess að fara að tíunda það mikið í smáatriðum hér þá get ég sagt ykkur það sem ekki eigið börn að á þeim sér maður eiginlega mest hvað tíminn líður hratt og að ótrúlegt en satt þá eldist maður líka. Meira að segja alveg jafn hratt og þau!!!!
Nóg af því, mér finnst alltaf jafn útrúlega hallærislega gaman að horfa á terrorinn hjá Sylvíu Nótt, horfi annars lítið á sjónvarp en þessi unga kona er algert uber. Það væri nú kannski gaman að leika svona innilega ýktan karater einn dag, bara til að fá fílinginn fyrir því hvaða viðbrögð aðrir sýna. Sný mér kannski “eingöngu” að því eftir háskólanámið? Því það sem er að gera sig í nútímanum er afþreying og helst nógu mikið og dramatískt!!!

2005-10-15T07:38:00.000Z

Síðustu dagar hafa farið fljótt hjá og skýringanna má leita til þess að það hefur verið alveg óskaplega mikið að gera. Fyrir ykkur hin sem ekki vitið það eru nú einungis 10 vikur í jólin svo nú er um að gera að bretta upp ermarnar og dreifa hveitinu um eldhúsið.
Einhvern tímann um daginn þegar ég var að keyra á minni eðalkerru í skólann fór ég að hugsa um hvað mér finnst í raun gott að keyra bíl. Þegar ég keyrir þá á ég oft mínar rólegustu stundir. Og þegar ég fór að velta þessu aðeins fyrir mér uppgötvaði ég svolítið skemmtilegt um sjálfa mig. Ég tek oftar en ekki mínar mikilvægustu ákvarðanir þegar ég er að keyra bíl.
Þegar ég var nýfædd og foreldrar mínir voru á leiðinni með frumburð sinn heim af sjúkrahúsinu sprakk dekkið á Wolgsvagen bjöllunni þeirra. Ég tel að það hafi makað djúp spor í samskiptum mínum við vélknúin farartæki.
Allavega hef ég eytt drjúgum hluta ævinnar á slíkum farkostum hvort sem um er að ræða bíla eða vélsleða. Því alla skólagöngu mína voru þessi tvö farartæki hluti af henni. Og rosalega var maður búin að spekúlera margt og mikið á þessum ferðarlögum.Mér finnst allavega afskaplega gott að keyra bíl og það er stundum mín afslöppun svona oftast nær allavega, kannski ekki þegar ég er í Reykjavík. Í sumar keyrði ég Kjöl, það var æðislegt. Veðrið var dásamlegt og stubbarnir mínir stein sváfu. Vá hvað mér leið vel !!!!!!!!

...en Berglind, jólaskrautið er komið í Ikea !!, nei bara svona svo þú vitir það...

Danmerkurdraumurinn

2005-10-04T23:18:00.000Z

Átti frábæra daga í Danmörku, er svo uppfull af minningum og upplevelsi að ég er eiginlega varla fær um að koma því alveg strax frá mér. Set mig síðar í gírinn og hendi hérna inn helstu atriðum úr ferðasögunni. Þakka frændfólki og vinum mínum stórum sem smáum fyrir allt gædið og mest af öllu skemmtilegan félagsskap. Vonandi get ég heimsótt þau fljótlega aftur. Hann litli frændi minn bræddi mig algerlega með ómótsæðilegum tilþrifum og einlægum brosum, og systir hans á sko ekki eftir að verða eftirbátur hans þegar hún stækkar. Þau eru sko sjarmatröll númer 1,2 og 3. Hérna á klakanum snýst allt um verkefni, próf og fyrirlestra svo langt sem augað eigir þannig að kannaki sofnar þetta blogg eitthvað í náinni framtíð, sjáum til.....

AU

...þarf ég að segja eitthvað meira?

2005-09-27T13:58:00.000Z

er að gera verkefni í hugfræði...

1. Rannsóknir hafa skoðað vinnsluminni og athygli aðskilið. Heldur þú byggt á lesefninu fyrir þessa málstofu að athygli og vinnsluminni ætti að vera skoðað saman? Ef svo, af hverju?

2. Gerir líkan Baddeley og Logie af vinnsluminni ráð fyrir samvinnu vinnsluminnis og athygli? Ef svo, hvernig? Útskýrðu hér líka örstutt hverjir helstu þættir líkansins eru.

3. Gæti líkan Baddeley og Logie útskýrt niðurstöður Strayer og Johnston?

4. Telur þú að sýnileg tengsl á milli þess að nota GSM síma og aukinni hættu á slysum í umferðinni gefi til kynna orsakatengsl? Útskýrðu svar þitt.

5. Hvað eiga rannsóknir Strayer og Johnston annars vegar og Roodenrys og fleiri hins vegar sameiginlegt?

Látið mig vita þegar þið sjáið mig næst.....

foreldraþankar

2005-09-26T12:51:00.000Z

Í dag er leiðinlegt veður, svo leiðinlegt að ég sá ástæðu til að draga seint og illa frá gluggatjöldin og halda mig heima í dag. Heima við húsmóðurstörf. Skrúbbaði af sameigninni og skúraði 60 fermetarana á þessu heimili fyrir hádegi. Sit hér ansi ánægð inni og gef þessu skítaveðri langt nef. Annars er ég samt uggandi yfir guttunum mínum, hvort þeim hafi orðið kalt út eða verið blautir úti í morgun, hvort þeir hafi verðið með nógu mikið af nógu hlýjum fötum með sér! Og hvort einhver hafi hjálpað þeim að bretta buxurnar ofan í ullarsokkana og setja stroffið á peysunum ofan í vettlingana o.s.frv. Þegar maður er foreldri dúkka upp endalausar áhyggjur yfir nánast öllu sem manni finnst geta haft áhrif á börnin sín. Hvort sem um er að ræða léttvæga hluti sem engum öðrum myndi detta í hug að pæla í eða eitthvað sem skiptir máli og maður hefur ekki gert rétt eða vildi hafa gert öðru vísi. En við erum öll mannleg, maður gerir sitt besta sem foreldri og enginn er fullkomin. Þetta reyni ég að sannfæra sjálfa mig um þegar allt í sambandi við börnin mín er naga mig í bakið. Ég hef nefnilega kenningu um foreldratýpur; það eru í fyrsta lagi til fyrirmyndarforeldrar, venjulegir foreldrar og lélegir foreldrar. Ég staðset mig sem venjulegt foreldri. Ég reyni mitt besta, myndi vilja gera ýmislegt örðuvísi og sé eftir sumu. En það breytir því ekki að mér þykir endalaust vænt um börnin mín, ef ég geri mistök þá segi ég fyrirgefðu og biðst afsökunar, því þannig vil ég að börnin mín geri ef þau geri eitthvað rangt. Foreldradansinn sem er oft á tíðum einn vanþakklátasti og vanmetnasti dans sem hægt er að stíga og hefur flókin spor, það er erfitt að halda takti og auðvelt að misstíga sig. En þegar það gerist þá er vert að minnast þess að dans krefst þolinmæði, aga og endalausrar þjálfunar til að verða áreynslulaus.

Kvöldfréttir les:

2005-09-22T21:51:00.000Z

Jamm til að segja eitthvað af mínum dögum þessa dagana; (getur maður annars sagt svona?). Þá einkennast þeir af spenningi yfir Danmerkurreisunni, kvíða yfir Danmerkurreisunni og streitu yfir Danmerkurreisunni. Er að reyna að halda mér á jörðinni og koma af þeim verkefnum sem ég þarf að klára áður en ég fer, en listinn er að verða kílómeterslangur! Er búin að hætta við og svo hætta við að hætta við og svona fram og til baka...Þegar ég ætla að byrja að læra veit ég varla hvar ég á að byrja, því þetta er einhvern veginn svo over my head en ætti náttúrulega að vera in my head! Þegar ég er ekki að læra sjálf er ég að læra með 6 ára syni mínum! Yngri guttinn hefur líka alveg látið finna fyrir sér og er heldur afbrýðissamur. Hann kom hreinlega með bækurnar sínar og henti þeim í mig í dag til að fá mig til að lesa fyrir sig. Í dag þegar ég var búin að segja óhóflega mikið “bíddu aðeins, elskan”! þá opnaði vinurinn hnífaparaskúffuna og fór að týna uppúr henni og henda á gólfið. Annað vinsælt er að fara inn á bað og sulla hressilega í baðvaskinum! Semsagt gera eitthvað sem vekur athygli, jákvætt eða neikvætt-bara að það sé athygli. Það er ein af aðalástæðunum fyrir því hversu mikið maður elskar börnin sín, þau eru yndisleg eins og þau eru, en yndislegust þegar þau sofa!

áríðandi tilkynning!

2005-09-18T13:09:00.000Z

...þið ykkar sem hafið fylgst með Danmerkurfantasíum mínum, þá eru þær á góðri hraðleið með að verða að raunveruleika! er búin að bóka flugið út svo VÍSINDAFERÐIN MÍN VERÐUR FARIN!!!!

http://www.psy.ku.dk/
http://www.psy.au.dk/en
http://www.hallonorden.org/

gaman að því! segi ykkur meira síðar!
ég held að ég sé líka búinn að laga commenta draslið hérna fyrir neðan þannig að það þurfi ekki að skila þvagprufu til að tjá sig eitthvað! það verður að hafa það þó einhverjir sem heita Umberto eða eitthvað álíka poppi upp með spam commets!

GÓÐAR STUNDIR!

Private events a la klettastígur

2005-09-17T18:16:00.000Z

Jæja, það er nú það. Búið að vera margt spennandi í gangi í félagslífinu. Reyndar byrjaði það nú ekki vel, stal óvart áfengisflösku af blásaklausri og áfengisþyrstri konu í ÁTVR sem ég í sakleysi mínu hélt að nágrannakona mín (við fórum semsagt tvær saman í ríkið með þessum afleiðingum!) hefði verið að kaupa! en nei nei og allt ríkið leit á mig-alkahólistann með dimmum dómaraaugum!! heppin var ég að ekki var hringt á lögguna! allavega var þetta pottþétt tekið upp á eftirlitsmynd og kannski get ég aldrei verslað neitt í ríkinu eftir þetta- sjáum allavega til, þetta er sennilega geymt en ekki gleymt dæmi því ókunnugt fólk kom í alvöru til mín um kvöldið að spyrja hvort það hefði verið ég sem reyndi að stela áfengi í ríkinu fyrr um daginn! En í gærkvöldi var samt dansað og djammað í Klettastígnum, eftir fróðlega vísindakynninu í Viking brugg. Komst að því þar að til eru tvær megin tegundir af bjór ! allavega bragggaðist gullið vel. Svo væri gaman að bjóða upp á mjöð í útskriftinni minni með gáfulegum myndum af mér( sem eru bytheaway ekki til ennþá!) eða einhverjum sálfræðifrösum! Eftir það lét ég draga mig í ættarkynningu þar sem ekki vildi betur til en svo að við réðumst inn á ólögráða unglinga að kela og sjúkranuddara sem þvær diskógallann sinn alltaf tvisvar. Hvað um það, þemakvöldið hérna í Klettastígnum tókst með ágætum en þemu (segir maður svona?) kvöldsins voru salsa, karlmenn og kærleiks- og íhugunarþema! Hvað þarf nú meira segi ég !!! Stuðmenn komu svo sterkir inn síðar þegar stígurinn var yfirgefinn, þetta var allavega alveg ruussssalegt allt saman og ekki nema gaman að því! En ég hef nú samt verið að pæla ýmislegt í dag, um þennan samskipta dans sem að fólk stígur í daglegu lífi og yfirleitt hraðar þegar það er í glasi. Ég fór nefnilega að velta fyrir mér hvað annað fólk pælir í öðru fólki þegar annað fólk sér ekki eða heyri ekki ( svona private events ( nánari lesning í Greimó)). Þegar ég hafði talað innilegar og meira við annað fólk á einu kvöldið eða meira heldur en ég hef kannski gert í tvö ár þó fór ég að spegúlera hvernig við lærum að þekkja annað fólk? Af reynslu, innri skynsemi, einhverskonar kynningarskemum djúpt í huganum, af afspurn, af útliti, af skóstært, af vaxtalagi, af háralit, af kyni, af aldri, af hlátri, af háralit, af tilfinningu? Já ég var nú bara að velta þessu fyrir mér?

A New guide to rational living

2005-09-16T08:24:00.000Z

er að byrja að lesa bók og byrja í sjálfstherapýu sem viðiðst taka á öllu í mínu lífi!
kaflarni heita m.a:

How far can you go with self-analysis?
Felling well by thinking straight
How you create your feelings
Thinking yourself out of teh emotional disturbances
Recognizing and attacking neurotic behavior
Overcoming the influences of the past
Refusing to feel desperatly unhappy
Howog to feel underepressed though frustrated
Controlling your own desteny
Conquering anxiety
Rewriting your personal history
Accepting reality
og Living rationally in unrationally world

bókin er náttúrulega eftir Ellis, svo kannski bæti ég því inn í nafnið mitt efitir þetta,
hvernig myndi það nú annars hljóma: Sigríður Ásta Hauksdóttir Ellis :-) gaman að því

...meeeeeeeee

2005-09-12T01:24:00.000Z

Um helgina var ég meðvirk með því litla samfélagi sem ég er fædd og uppalin í. Þetta er annars mjög sértæk upplifun þegar göngur og réttir eru á haustin. Þetta er að miklu leiti ein útþandasta karlmennsku hormóna kapphlaup sem ég hef séð. Mín upplifun í gegnum þetta er samt sterk og ástæður þess er sennilega að rekja til bernskunnar og þeirra róta sem ég á við mína; heimasveit og uppruna. Hvað um það. Þó svo ég hafi aldrei verið “innlimaður” meðlimur í þennan “gagnamannaklúbb” þá fylgir þessu einhver forn-frægðarljómi um hetjurnar miklu sem fóru yfir hryggi,fram brúnir,inn dali,upp í skálir,uppundir nef,ofan í lautir og hvað þetta heitir nú allt út frá staðfræðilegum kennileitum hvers svæðis. Þegar til byggða var svo komið seint og síðar þegar farið var að líða á daginn gengu fjálglegar sögur um drýgðar hetjudáðir eða “andskotans aumingjaskap”annarra gangnamanna. Allskonar bölmóður og ýfingar voru of milli manna þegar þeim var heitt í skapi og “féð hagaði sér ekki eins og það átti að gera” og alltaf var það fé einhvers annars bónda eða stórfrænda sem í sök átti. Enda kom það svo upp úr kafinu að það fé var yfirleitt alltaf “rýrast og minnst”sem í næsta dilki var ( hér er dilkur í merkingu þess að vera afgirtur hluti eða hólf í fjárrétt- þar sem hver bær hefur sinn dilki. Er talað um í þessu samhengi að draga fé í dilka). Þessu öllu saman var svo skolað niður með göróttu glundri og buxum, brókum svo spilað af sér í húmi nætur. Það er ekki von af alltaf hafi vel farið !
Þrátt fyrir heldur “einsleita”slagsíðu í þessari frásögn er meira tilstandið í sveitinni kringum gangadaginn meira heldur en á þjóðhátíðardaginn, enda gangangandagurinn hátíðadagur sveitarinnar að fornu sem nýju- þó ekki væri nema félaglega! Til að enda frásögn mína minnist ég þess þegar ég var kannski í mesta lagi 6.ára og fullur samsveitungi minn og nágranni okkar í sveitinni kallaði pabba minn “gamla ref” á þessum degi. Á þeim tíma hafi pabbi verið svolítið í að vinna á refagrenjum og mér fannst refir fyrirlitlegar skepnur þannig að barnshjartað getur varla fyrirgefið þessum manni fyrir að hafa kallað pabba minn “gamla ref”! pabbi minn var algerlega heilagur maður sem aldrei yrði líkt saman við urrandi meindýr sem ætu lítil og sæt lömb. Til að hefna mín á þessum vonda manni sem sagði svona ljótt um pabba minn ætlaði ég að ná í stóra mottuflengjarann hennar ömmu og láta hann hafa það óþvegið (hugsið ykkur ofbeldis......) Annað að afi minn hafði sennilega einhvertímann verið eitthvað á rallinu þennan dag og lagt sig svo eitthvað en allavega var hann syngjandi inn í rúmi, ég gleymi ekki þegar amma var að reyna að segja mér að “hann væri aðeins lasinn” því ég trúði henni ekki fyrir fimm aura!!

ég er ofurkona

2005-09-06T22:10:00.000Z

Ég er ofur-kona. Ég er svo mikil ofur-kona að allt er ofur-mikið mál hjá mér þessa dagana. Það er ofur-lítill tími til að koma frá sér einhverju vitrænu á blað. Gamalkunnur krampi fer um limbíska kerfi heilans og möndluna, spurning um drekann líka. Þetta er hinn ofur-ægilegi skólaskjálfti. Það er að verða framundan ofur-mikið að gera á ofur-litlum tíma og ég verð með ofur-mikið samviskubit yfir ofur-miklu af verkefnum sem ég þarf að leysa á ofur-litlum tíma. Ég er ofur-mamma með ofur-stórt samvikubit því ofur-konulífið leyfir bara ofur-lítinn tíma fyrir ofur-börn. Ofur-samviskubitið verður alltaf ofur-stærra og ofan á allt fer mig að dreyma ofur-stóra framtíðardrauma um ofur-lítið einkalíf- einhvern tímann! Ég er ofur-kona.

Strúnudagur

2005-09-04T21:35:00.000Z

Hef átt ansi rólegan dag. Svo rólegan að ég man varla eftir öðru eins. Það er nú kannski eins gott því það verða lítil rólegheit næstu vikurnar ef marka má kennsluáætlanir kennaranna minna. Annars eru þetta samt áhugaverðir áfangar sem ég er í, svona allavega ef eitthvað er að marka svoleiðis eftir fyrstu skólavikuna. 5 einingar í Rannasóknaraðferðum í sálfræði, 5 einingar í Sérefni hugar og heila, 3 í Greiningu og mótun hegðunar og 2 í Þróunarsálfræði II. Semsagt verður heilinn á mér orðin vel viðbrunnin þegar kemur að langþráðu jólafrí sem verður vonandi með fyrra fallinu í desember. Þar fyrir utan eru blikur á lofti með að B.A verkefninu mínu verði startað á allra næstu vikum, jú trúið þið því kellan mun sennilega útskrifast næsta vor!! Mesti höfuðverkurinn er samt hvað verður eftir það? Háleitar hugmyndir eru þó uppi á framtíðarborðinu sem ég kasta ekki rafrænt út í loftið að svo stöddu.
Dagurinn í dag er samt hinn mesti yndælisdagur því í dag er Strúna systir mín árinu eldri en í gær. Sendi henni mínar bestu afmælisóskir til heimsborgar Rómarveldis þar sem hún hefur vonandi átt góðan dag. Annars er Strúnan ein yndislegasta kona sem ég þekki . Við höfum nú ekki alltaf verið neinir perluvinir en höfum náð tilfinningalegum þroska til að taka hvor annarri eins og við erum. Þannig að þessi dagur er Strúnudagur hjá mér!

Vinstri eða hægri?

2005-09-03T17:41:00.000Z

Get ekki ákveðið hvað ég á að fara að gera. Heilinn segir eitt en höndin annað. Þessi dagur hefur einkennst af enn meiri leti. Hef ekki ennþá litið í námsbækurnar. Verð fyrir stöðugu áreit sem lýsir sér einna helst þannig að ég er algerlega einbeitingarsnauð!!Annars leit ég aðeins á lífið í gærkvöldi með Heldrikvennaklúbbnum Kátum og Kankvísum. Annars var ég hálf illa á mig kominn, sjónlaus á öðru auganu og blind á hinu í kjölfar svæsinnar öndunarfærasýkingar sem áður hefur verið minnst á. Auk þess að hafa spjallað einum of lengi við hvítvínsglasi mitt áður en við fórum af stað. Heilsan var samt furðu góð þegar ég vaknaði í morgun og tók til óspilltra málanna við að koma mér á fætur. Tími minn eftir það hefur að mestu farið í að hlú að umhverfinu: þvoði bílinn og fékk í leiðinni kast yfir því hvað lakkið er farið að láta á sjá eftir tíðar ferðir yfir Lágheiðina síðustu misseri. Einnig keyrslu á vegum þar sem verið er leggja bundið slitlag. Er að hugsa um að fara í mál við samgönguráðuneytið vegna þess. Hjálpaði því næst frænku minni að flytja og ráðskaðist með hvað hún ætti að kaupa í matinn. Síðan þá hef ég verið dunda á netinu, setja inn tengla hér á síðuna og eins og ég sagði dunda....

..smættarhyggja

2005-09-02T19:50:00.000Z

Mikill maður sagði eitt sinn í mín eyru að blogg væri bara rembingur. Ég tel það ekki alveg standast, ég ætla hins vegar ekki að segja að blogg geti ekki verið rembingur. Túlkun og tjáningarfrelsi eru stóru breyturnar í þessu öllu saman, vísa að öðru leiti í RAS0275 máli mínu til stuðnings. Annar hafið ég hugsað mér að vera með rembing í pistli dagsins. Er samt ekki alveg í formi til þess. Er búin að vera alveg ógeðslega dugleg þessa vikuna, en sei sei nei ekki við það sem ég ætti þó að vera að kljást við. Skólabækurnar bíða enn eftir að verða strokið uppúr og niðrúr. Hér á heimilinu eru ríkjandi ferskir vindar smættarhyggju og nauðhyggju sem lýsa sér einna helst í því að endurnýta gamalt dót, málningarvinnu og geysilegu magni af rusli sem ég hef hent síðustu daga. Hér skal hver fermetir nýttur til hins ýtrasta.Ofan á allt annað er ég búin að vera með afar ógeðfellda öndunarfærasýkingu (hor í nös). Þannig að eftir þessar miklu hamfarir á heimilinu hef ég nú lagt árar í bát og snúið mér aftur að akademískum ferli mínum. Mun því taka til óspilltra málanna á morgun og lesa af krafti í skólabókunum mínum ení kvöld er það alkahol og afsleppesli!
Í guðs friði

Monsúntíminn

2005-08-30T15:15:00.000Z

...nú er monsúntíminn hafinn á Akureyri. Sá tími einkennist hér af rigningu og aftur rigningu. Einnig verður stórhættulegt að ferðast fótgangandi því sumir akandi vegfarendur gera sér það held ég til skemmtunar að skvetta og frussa yfir fótfætlinga. Buxnaskálmar eru blautar, það þarf rúðuþurrkur á gleraugu, sumir eru reyndar svo forsjálir að draga upp úr pússi sínu til þess gerðar regnhlífar. Oftar en ekki eru það útlendingar. Einu sinni hélt ég að Guð væri að vökva blómin sín en sá tími er löngu liðinn. Nú er tími veðurfrétta. Annars sagðist einn vinur minn í dag ekki skilja veðurfréttir og nefni "slydda á annesjum" , "súld á stök stað" máli sínu til stuðnings. Hvar er annars "væta hér og hvar"? Ég fór að huga aðeins um þetta og hef svo sem lítið pælt í þessu þannig, en í sveitnni eru veðurspáin á RÚV nánast mikilvægari en fréttirnar. Það að "taka veðrið" var mikið ábyrgðarstarf því það hafið lykiláhrif á hvað yrði unnið þann daginn. Til að taka þetta málefni "veðrið" á sálfræðinni er vert að íhuga að veður hefur áhrif á hvernig okkur líður? allavega finnst mér það, sendi ykkur því blautar og blúsaðar kveðjur úr monúnrigningunni á AK.

Þrasið er hafið aftur

2005-08-29T17:49:00.000Z

Jæja þá er ég komin í netheimana aftur og ætla að þrasa og rausa eins og ég er löng til! Hef nú nýlega kvatt læknavísindin, semsagt sumarið búið og þar með sumarvinna og tek ég því hér eftir upp félagvísindalegar nálganir á nýjan leik!
Með bros á vör og tár á kinn segi ég ykkur söguna af kveðjukökunni sem ég lagði drög að á fimmtudagskvöldið sem varla væri í frásögur færandi nema af því allt gekk bókstaflega á báðum afturfótunum! Eftir að hafa slegið út rafmagninu í annað skiptið hugsaði ég nú með mér að það yrði að hafa það þó köku......inn yrði hrá suðsuðvestur af vinstra horninu hægra megin til hliðar við hinn endann. Þegar kakan leit út fyrir að vera sómasamleg svona utanfrá allavega kom upp nýtt vandamál þar sem ísskápurinn var ekki nothæfur til þess að kæla kökuna upphófst mikil verkfræðivinna í þoku, kulda, myrkri og ógeðslegri rigningu við að klambra saman skýli fyrir kökuna á svölunum hjá mér. Skýlið samanstóð í lokin af leikfangakassa úr plasti, svörtum ruslapoka, litlu borði, öðrum poka og til að tryggja að ekkert færi nú af stað var sett þar kyrfilega ofan á málmhringur sem annars er kertastaki undir útikerti. Til að kóróna nú allt saman var ég um morguninn næstum fokin með herlegheitin, svo kökulufsan leit að lokum út eins og rokveðrað abstraktverk á hraðleið út af kökudiskunum! Þannig að kakan fær greininguna : Kransæðaherpingur með kvíðastilltu ívafi NOS JAMM Z26.8

Þess má geta að lokum að enginn hefur kvartað eða látið lífið eftir að hafa bragðað kökulufsuna